بدء العد بالتنازل

بدء العد بالتنازل ......
والعمر لم روحه نازل...
والفراشات اشتهن ماي الورد ..........
والورد ذابل ....
والفرح ترس الدشاديش الزغيره.....
يلاعب اطراف الجناجل....
والعصافير بنخلنه تمازحن.....
وتشابكن وي البلابل.....
والكمر عريس ونجوم الكمر صفكه وهلاهل....
والدواليب بعجدنه تدور بينه....
وانه وي ربعي الزغار....
ملبس وجكليت شايل...
والحمامات اليزفن .واليهدلن....
فوك شرفات المنازل ...
والمطر يركص فرح ....
ويغني كل الليل نايل ..
ولعمر يركض مراكض خيل...
وينكض الاصايل...
ومرت سنين وكبرنه....
وما درينه العمر يحصدنه...
مثل حصد السنابل.....
ومرت ايام الطفوله وراجعتهه...
ولنهه بس دخان موكد...
والعمر يوميه شايل...
ولنهه مثل الحلم مرت...
ومادريت العمر بالخمسين واصل...
مدري اضحك ...
مدري ابجي ...
مدري انه الجابته امه...
مدري هي بغيري حامل....
هاي بلوة وما الك كل راي بيهه....
وغصبن اعليك انت قابل.....
هيه اعظم فلم عنوانه الجريمه....
والحوارالبيهه كامل..
انت وين تريد منطي الوجه......
هذا اليوم راحل....
بدء العد بالتنازل....
والعمر لم روحه نازل ... الشاعرالصافي